गुप्तेश्वर गुफाको साधारणसभा तथा अधिवेशन सम्पन्न

पर्वत २०७४ असार १० । धार्मिक तथा पर्यटकीय महत्वको गुप्तेश्वर गुफाको साधारणसभा तथा अधिवेशन शनिवार सम्पन्न भएको छ । कुश्मा नगरपालिका वडा ४स्थित गुफा परिसरमा गुप्तेश्वर धार्मिक तथा पर्यटकीय विकास संस्थाको १८ औं साधारणसभा तथा अधिवेशन सम्पन्न भएको हो ।
कार्यक्रममा प्रमुख अतिथि कुनपा ४ वडा अध्यक्ष मिना कर्माचार्य रहेकी थिइन् ।

प्रमुख अतिथि कर्माचार्यले गुप्तेश्वर गुफा एउटा वडा र कुश्माको मात्र नभई सिंगो जिल्लाको गहना भएको बताइन् । उनले भौतिक संरचना निर्माणले गुफाको विकासमा टेवा पुगेको र सामाजिक कार्य इमान्दारिताका साथ पुरा हुनु राम्रो भएको उल्लेख गरिन् । गुफाको भौतिक विकासमा आफ्नो वडाबाट हुनसक्ने आर्थिक र भौतिक जुनसुकै सहयोग गर्न आफू तयार रहेको उनको भनाई थियो ।

कार्यक्रममा गुफाका वरिष्ठ सल्लाहकार बलराम कर्माचार्यले आफ्नो भनाई राख्दै निर्माणाधिन भौतिक संरचनाको सुरक्षाका लागि खोलामा तटबन्ध निर्माण गरिनुपर्ने बताए । उनले बलियो गरी पर्खाल लगाएर खोलालाई छेक्न नसक्ने हो भने पचासौ लाख खर्चिएर निर्माण गरिएको गुफाको भवन जोखिममा पर्न सक्ने संकेत गरे । गुप्तेश्वर व्यवस्थापन समितिको पहलमा संचालनमा आएको वेदवेदांग पाठशालाले गुफा समितिसँग सहकार्य नगरी हिड्ने गरेको भनी सल्लाहकार कर्माचार्यले गुनासो व्यक्त समेत गरेका थिए ।
कार्यक्रममा गुफा परामर्श समिति सदस्य बसन्त बहादुर सिकेले गुफामा भौतिक संरचना निर्माणको कार्य हुनु राम्रो भएको भनी तारिफ गरे । गुफा व्यवस्थापन समितिमा जोसुकै आए पनि सवैसँग सहकार्य गरी अगाडि बढ्न उनले सुझाए ।
उक्त कार्यक्रममा परामर्श समिति सदस्य लक्ष्मीकान्त आचार्य, पत्रकार महासंघ पर्वतका उपाध्यक्ष तथा गुफा कार्य समितिका सदस्य प्रनिश गिरी, एकता युवा क्लवका सचिव गोकुल शर्मा लगायतले ।मन्तव्य राखेका थिए ।

गुफा व्यवस्थापन समिति सदस्य मानकुमारी गिरीले कार्यक्रममा स्वागत मन्तव्य राखेकी थिइन् भने संचालन सहसचिव विष्णुप्रसाद नेवारले गरेका थिए ।

कार्यक्रममा संस्थाको आर्थिक वर्ष०७०/०७१देखि ०७३/०७४ सम्मको आयव्यय सार्वजनिक गरिएको थियो । आयव्यय सार्वजनिक गरेका संस्थाका कोषाध्यक्ष गणेश भण्डारीका अनुसार कुल आम्दानी २ लाख ९७ हजार ५ सय छ भने उठ्न बाँकी रकम ७ लाख ४९ हजार बराबर छ । आर्थिक वर्ष ०७३/०७४ को कुल खर्च रकम १ लाख ४८ हजार बराबर छ । गुफा संस्थाले विभिन्न व्यक्तिहरुलाई व्याजमा लगानी गरेको उल्लेख छ । केही व्यक्तिले गुफाको रकम व्याजमा लिएका तर लामोसमयदेखि साहु व्याज समेत नतिरेको देखिन्छ ।
त्यसैगरी गुफाको भौतिक संरचना निर्माण उपसमिति कोषाध्यक्ष शिवप्रसाद सुवेदीले भौतिक संरचना निर्माणका लागि ३३ लाख ७५ हजार बराबर खर्च भएको विवरण पेश गरेका छन् भने भुक्तानी दिन बाँकी हिसाव ४ लाख ९८ हजार बराबर छ ।

कार्यक्रम संस्थाका अध्यक्ष बालगोपाल श्रेष्ठको अध्यक्षतामा सम्पन्न भएको थियो । अध्यक्षको मन्तव्य राख्दै श्रेष्ठले सवैको साथ र सहयोगबाट गुफामा भौतिक संरचना निर्माणको कार्यले गति पाएको उल्लेख गरे । गुप्तेश्वर गुफाको महत्व धेरै भएको बताउदै उनले सवै मिलेर विकासका लागि लाग्ने हो भने गुफालाई चार नम्वर प्रदेशकै पर्यटकीय केन्द्र बनाउन सक्ने दावी गरे । नयाँ कार्यसमिति गठनको प्रक्रिया भने आइतवार मात्र पुरा गरिने संस्थाका पदाधिकारीहरुले जनाएका छन् ।

फेसबुकमार्फत कमेन्ट गर्नुहोस !

Leave a Reply

Your email address will not be published. Required fields are marked *